Më 18 Mars 2024, Shoqata “Gjergj Kastrioti – Zvicër” shprehu mirënjohjen më të thellë dhe falënderimet më të përzemërta për Z. Veli Genc Berisha dhe Shoqatën “Hora e Skënderbeut” për mundësinë e pjesëmarrjes në një projekt tejet domethënës dhe të shenjtë: vendosjen e shtatores së Gjergj Kastriotit – Skënderbeut në Horën e Arbëreshëve, Sicili – vend i shenjtë i kujtesës dhe rrënjëve tona të përbashkëta kulturore e kombëtare.

Ky projekt përfaqëson më shumë se një nismë artistike – ai është një akt identitar që lidh gjakun arbëror përtej deteve dhe kontinenteve, në një gjuhë të përbashkët krenarie dhe trashëgimie. Është një dëshmi se figura e Skënderbeut nuk njeh kufij, sepse ai jeton në zemrat e gjithë shqiptarëve, kudo që ndodhen.

Një falënderim i veçantë iu drejtua gjithashtu portalit informativ Albinfo.ch, i cili me profesionalizëm e përkushtim ka ndihmuar në përçimin e këtij misioni fisnik, duke e bërë më të njohur këtë nismë në opinionin publik.

Shoqata “Gjergj Kastrioti – Zvicër” e konsideron këtë pjesëmarrje si privilegj të veçantë dhe burim krenarie, si dhe një shtysë të re për të vazhduar me përkushtim misionin e saj për ruajtjen, promovimin dhe nderimin e vlerave historike të Kombit Shqiptar.

Lavdi përjetë Heroit tonë të pavdekshëm, Gjergj Kastriotit – Skënderbeut!