Në një atmosferë të ngrohtë, solemne dhe frymëzuese, Shoqata “Gjergj Kastrioti” Zvicër organizoi më 18 maj 2025 ekspozitën pamore “Gjergji në Art”, kushtuar 620-vjetorit të lindjes së Heroit tonë Kombëtar, Gjergj Kastriotit – Skënderbeut. Ky aktivitet i jashtëzakonshëm kulturor, i mbajtur në Bülach, Zvicër, bashkoi artistë, studiues, historianë, diplomatë dhe dashamirë të artit e kombit shqiptar, duke e bërë figurën e Skënderbeut të rilindë përmes penelit, skulpturës, fjalës dhe frymës artistike që ndërthur historinë me identitetin kombëtar. Ekspozita u konceptua si një urë lidhëse midis brezave dhe kohëve, duke e përjetësuar figurën e Gjergj Kastriotit-Skënderbeut në forma bashkëkohore, ku arti u bë gjuhë e përbashkët e krenarisë dhe kujtesës shqiptare.

Fjalimi i Kryetarit të Shoqatës, z. Agim Pepaj
“Të dashur fëmijë, motra dhe vëllezër në Gjergj Kastriotin, të nderuar të pranishëm, mirëdita dhe mirë se keni ardhur në këtë aktivitet, organizuar me rastin e 620-vjetorit të lindjes së të pamposhturit, Gjergj Kastrioti – Skënderbeu. Shoqata jonë ka kënaqësinë t’ju mirëpresë në këtë ekspozitë pamore me titullin ‘Gjergji në Art’, ku përmes veprave artistike sjellim një pasqyrim të kontributit dhe jehonës së kësaj figure në ndërgjegjen kombëtare.”
“Jeta dhe veprimtaria e tij përfaqësojnë një periudhë të rëndësishme të rezistencës së popullit arbëror ndaj pushtimeve të kohës, si dhe një model udhëheqësie e përkushtimi për mbrojtjen e atdheut. Figura e tij mbetet një pikë referimi për identitetin tonë kombëtar dhe një burim frymëzimi i pashtershëm për brezat që vijnë.”
“Një falënderim i veçantë shkon për artistët, sponsorët dhe bashkëpunëtorët tanë, të cilët me mbështetjen e tyre dhe përkushtimin njerëzor kanë bërë të mundur realizimin e këtij aktiviteti. Lavdi jetës dhe veprës së Gjergjit të Madh Kastriotit! Rroftë shqiptaria!”

Përfaqësimi diplomatik
Në emër të Ambasadës së Republikës së Shqipërisë, Ambasadës së Republikës së Kosovës dhe Ambasadës së Maqedonisë së Veriut, fjalën e mbajti znj. Shukrie Ramadani, e cila përcolli një mesazh të thellë bashkimi e krenarie kombëtare:
“Skënderbeu nuk është vetëm një figurë historike – ai është drita që ndriçon rrugën tonë kombëtare. Kjo ngjarje është dëshmi se, kudo që jemi, shqiptarët mbetemi një popull me rrënjë të thella, me shpirt të fortë dhe me dashuri të përjetshme për atdheun.”

Kumtesat shkencore dhe artistike
Ekspozita u pasurua me kumtesa dhe diskutime të rëndësishme nga studiues e kuratorë të njohur:
Historiani Paulin Zefi, me kumtesën “Portreti artistik autentik dhe fizionomia e Gjergj Kastriotit-Skënderbeut”, ndriçoi aspektet historike dhe ikonografike të figurës së Heroit në artin evropian dhe shqiptar, duke theksuar rëndësinë e portretit origjinal të ruajtur në Galleria degli Uffizi, Firence.
“Në artin pamor ekzistojnë dy mënyra për të pasqyruar figurën e Skënderbeut – fytyra e ashpër dhe burrërore e prijësit të pathyeshëm, dhe tiparet e ëmbëlsuara të atit që u jep besim bijve. Kjo është madhështia e tij – njëkohësisht luftëtar dhe shenjtor i kombit.”

Kuratori dhe kritiku i artit Ilir Muharremi, në kumtesën “Udhëtimi estetik i Gjergj Kastriotit-Skënderbeut”, foli për dimensionin estetik e filozofik të ekspozitës:
“Ekspozita ‘Gjergji në Art’ është një mozaik frymëzimi, ku arti shqiptar bën bashkë gjeneratat, hapësirat dhe kohët. Skënderbeu i flet secilit artist ndryshe – si simbol i lirisë, i dashurisë për atdheun dhe i guximit për ta mbrojtur identitetin tonë.”

Artistët pjesëmarrës
Agim Ramadani – Hero i Kosovës, Ahmet Ibrahimi, Ardian Pepa, Augustin Pergega, Bujar Vani & Evisi Kabilo, Butrint Morina, Daors Hoxha, Dorina Ukgjini, Dussi Sadriji, Etmond Balaj, Fatmir Dragusha, Florim Shaqiri, Gabriela Memaj Thaçi, Gëzim Muriqi, Gjergj Kola, Irena Toma, Irfan Grajçevci, Jacqueline Bislimi, Jalldëze Mustafa, Jeton Lleshi, Kushtrim Sylejmani, Marigona Toma, Nagip Tashi, Naser Dushica, Pren Berisha, Refki Gollopeni, Rexhep Leci, Sak Muji, Valerijana Krasniqi, Visar Kryeziu.

Sponsorët & Mbështetësit (renditur sipas alfabetit)
Albinfo.ch, Ansambli i Valleve “VATRA”, ArtPlisi, Avni Gallapeni, Blitz Fahrschule, Graphikon Design, grafik · print · web – id-script, Hora e Skënderbeut, Klubi Kulturor Shqiptare “VATRA”, Nikolla & Co AG, NICCO & PARTNER AG – Gipser & Malerarbeiten, Prointegra.ch, Ristorante Da Paolo, SAM4info, Sanivor AG, SB Hauswartungen, SCANDERBEG IMMOBILIEN, Shoqata “Ndue Perlleshi”, Swiss Eagle Coffee, Ujë Rugove Schweiz, VIVAQUA AG, Visar Kryeziu Photography,Nënat / Gratë / Motrat “VATRA”

Lavdi Skënderbeut! Lavdi artit që e mban gjallë kujtimin e tij!

Me respekt dhe dashuri për të pamposhturin Gjergj Kastrioti-Skënderbeu
Shoqata Gjergj Kastrioti Zvicër

Një rikthim përulës në gurthemelin e bashkimit kombëtar shqiptar

Më 2 Mars 2025, në përvjetorin e Besëlidhjes së Lezhës, një nga ngjarjet më madhore të historisë sonë, Shoqata “Gjergj Kastrioti – Zvicër” zhvilloi një vizitë nderimi në qytetin e Lezhës, në vendin ku më 1444 u mblodhën princat shqiptarë nën udhëheqjen e Gjergj Kastriotit – Skënderbeut, për të vendosur bashkimin dhe qëndresën kundër pushtuesit osman.

Homazhe dhe përulje para figurës së pavdekshme të Kryeheroit

Në këtë ditë të shenjtë për kombin tonë, Shoqata bëri homazhe dhe përulje të thellë në memorialin e vendvarrimit të Skënderbeut, si shprehje e nderimit dhe mirënjohjes së pakufishme ndaj figurës që mbrojti lirinë, nderin dhe identitetin e shqiptarëve me guxim të pashoq.

U ngritën lule dhe u mbajt një moment reflektimi për atë që historia e quan me të drejtë mbrojtësi i qytetërimit perëndimor, një burrë që armiku e quajti “përbindësh” – sepse ishte i pathyeshëm dhe i pamëshirshëm ndaj pushtimit.

Pjesëmarrje në manifestimin përkujtimor dhe zbulimi i shtatores së re të Skënderbeut

Me ftesë të drejtorit të Kulturës në Bashkinë e Lezhës, z. Paulin Zefi, Shoqata mori pjesë në manifestimin qendror përkujtimor të zhvilluar në sheshin përballë memorialit, ku u bë edhe zbulimi i shtatores së re madhështore të Gjergj Kastriotit – Skënderbeut, një vepër artistike e cila përjetëson heroizmin, urtësinë dhe fuqinë e prijësit tonë kombëtar.

Pritje zyrtare nga autoritetet vendore – Njohje për diasporën

Në këtë ditë solemniteti dhe krenarie, Shoqata “Gjergj Kastrioti – Zvicër” pati nderin të pritet zyrtarisht nga:

• Kryetari i Bashkisë së Lezhës, z. Pjerin Ndreu, i cili falënderoi mërgatën për ruajtjen e vlerave historike, kulturore dhe për promovimin e figurës së Skënderbeut në Zvicër dhe më gjerë.
• Prefekti i Qarkut të Lezhës, z. Taulant Malshi, i cili shprehu respekt të thellë për punën dhe angazhimin atdhetar të Shoqatës, duke e cilësuar praninë e tyre si një urë frymëzuese midis Atdheut dhe diasporës.

Një përvojë që ngjall frymëzim dhe përgjegjësi

Kjo ngjarje përkujtuese ishte një përvojë e thellë shpirtërore dhe kombëtare për anëtarët e Shoqatës, e cila jo vetëm që i bashkoi me rrënjët e lavdisë sonë historike, por edhe i motivoi të vijojnë rrugën e promovimit të trashëgimisë kombëtare në vendin ku jetojnë e veprojnë.

Lavdi përjetë Gjergj Kastriotit – Skënderbeut!

Rroftë bashkimi shqiptar!

Rroftë Shqipëria dhe Arbëria jonë!

Një përulje madhështore përpara historisë dhe themeluesit të bashkimit shqiptar

Më 1 Mars 2025, Shoqata “Gjergj Kastrioti – Zvicër” zhvilloi një vizitë përkujtimore dhe nderimi në Kalanë e Krujës, zemrën simbolike të qëndresës shqiptare dhe vendin ku u shkrua një nga kapitujt më të lavdishëm të historisë sonë – Besëlidhja e Lezhës e 2 Marsit 1444, e udhëhequr nga Kryeheroi i kombit shqiptar, Gjergj Kastrioti – Skënderbeu.

Vizitë në Muzeun Kombëtar “Gjergj Kastrioti Skënderbeu” – Krujë

Gjatë kësaj vizite solemne, përfaqësuesit e Shoqatës u pritën me respekt dhe mikpritje të veçantë nga drejtuesit e Muzeut Kombëtar “Gjergj Kastrioti Skënderbeu” në Krujë, një institucion historik dhe edukativ që përmbledh me dinjitet figurën, veprën dhe trashëgiminë e përjetshme të Heroit tonë Kombëtar.

Anëtarët e Shoqatës patën mundësinë të njihen nga afër me objekte historike, dokumente të rralla, simbole të Besëlidhjes, portrete dhe artefakte, që ruajnë shpirtin e epokës së lavdishme të shekullit XV. Ishte një përvojë e thellë shpirtërore dhe edukative, që na afron me rrënjët tona dhe na rikujton përgjegjësinë për t’i ruajtur ato gjallë.

Homazhe dhe nderim në kalanë e qëndresës

Brenda mureve të Kalasë së pamposhtur të Krujës, u mbajt një moment solemn homazhi, përuljeje dhe reflektimi përpara madhështisë së figurës së Gjergj Kastriotit – Skënderbeut, dhe për prijësit që bashkuan forcat në emër të atdheut, lirisë dhe dinjitetit.

Në këtë vend të shenjtë historik, ku u formësua ideja e bashkimit kombëtar shqiptar për herë të parë në mënyrë të organizuar, u ngrit një lutje për unitetin, forcën dhe vazhdimësinë e identitetit tonë kombëtar ndër breza.

Mesazh i përjetshëm nga Kalaja e Krujës

Në përfundim të vizitës, Shoqata “Gjergj Kastrioti – Zvicër” shprehu me krenari:

Lavdi të përjetshme Gjergj Kastriotit – Skënderbeut!Nderim i përjetshëm për Besëlidhjen e Lezhës dhe burrat që vendosën mbi vetveten – atdheun! Kruja do të mbetet përherë kala e shpirtit kombëtar shqiptar!

Ky përvjetor nuk ishte vetëm një datë historike, por një thirrje për të gjithë shqiptarët që të kujtojnë me zemër dhe të veprojnë me ndërgjegje kombëtare – si trashëgimtarë të Skënderbeut dhe Besëlidhjes së tij.

Më 17 Shkurt 2025, Shoqata “Gjergj Kastrioti – Zvicër” pati nderin dhe kënaqësinë e veçantë të marrë pjesë në pritjen solemne të organizuar nga Ambasada e Republikës së Kosovës në Bernë, me rastin e 17-vjetorit të Pavarësisë së Republikës së Kosovës – një ditë e shenjtë dhe historike për mbarë kombin shqiptar.

Ky moment festiv ishte një ngjarje me karakter kombëtar dhe diplomatik, ku u mblodhën së bashku përfaqësues të institucioneve të Kosovës, personalitete të jetës shqiptare në Zvicër, diplomatë të huaj, aktivistë të shquar dhe figura të nderuara nga mërgata shqiptare. Ishte një mbrëmje krenarie, përkujtimi dhe uniteti kombëtar.

Takime me personalitete dhe frymë bashkëpunimi

Përfaqësuesit e Shoqatës “Gjergj Kastrioti – Zvicër” patën kënaqësinë të takojnë shumë personalitete të jetës publike, kulturore dhe shoqërore shqiptare në Zvicër, duke shkëmbyer përshëndetje, urime dhe ide për forcimin e lidhjeve kombëtare dhe mbështetjen e përbashkët ndaj çështjeve të interesit të përbashkët për komunitetin tonë.

Në një atmosferë vëllazërore dhe respekti të ndërsjellë, u përçuan urimet më të përzemërta për Dardaninë e Shenjtë, për shtetin e Kosovës, për përparimin dhe forcimin e saj në arenën ndërkombëtare, dhe mbi të gjitha për vazhdimësinë e ruajtjes së identitetit tonë kombëtar në diasporë.

Art, kulturë dhe krenari shqiptare

Një pjesë e veçantë e kësaj ngjarjeje ishte edhe ekspozita artistike me punime të shumta të artistëve shqiptarë, të cilët përmes ngjyrave, formave dhe përfaqësimeve simbolike shpalosën pasurinë shpirtërore dhe kulturore të kombit tonë. Shijuam me krenari krijimtari të frymëzuara nga rrënjët tona historike, figura kombëtare dhe realitete moderne.

Ishte një kënaqësi të shihje sesi arti shqiptar mbetet gjallë në çdo cep të botës, dhe sesi krijuesit tanë – të rinj e të vjetër – bëhen zë i shpirtit kombëtar, duke na kujtuar që një popull me kulturë dhe histori të pasur është i përjetshëm.

Mesazh për Pavarësinë dhe të ardhmen

Në fund të pritjes, Shoqata “Gjergj Kastrioti – Zvicër” përçoi urimet e saj zyrtare:

Urime 17-vjetori i Pavarësisë së Kosovës!

Rroftë Dardania e Shenjtë!

Rroftë kombi shqiptar, i bashkuar në gjuhë, kulturë dhe vlera!

Ky përvjetor nuk është vetëm një datë kalendarike, por një moment për reflektim, vlerësim dhe angazhim të mëtejshëm për forcimin e shtetit të Kosovës dhe lidhjes së pandarë mes shqiptarëve kudo që ndodhen.

Më 28 Nëntor 2024, Shoqata “Gjergj Kastrioti – Zvicër”, në kuadër të bashkëpunimit me Ansamblin “Vatra”, organizoi një manifestim solemn dhe frymëzues për të kremtuar me nder, përkushtim dhe dashuri të thellë kombëtare FESTAT E NËNTORIT – datat më të lavdishme dhe më të shenjta të historisë sonë.

Në një atmosferë të mbushur me simbole, këngë patriotike, flamuj kuqezi dhe mall për atdhe, u përkujtuan momentet themelore të identitetit dhe qëndresës sonë si komb:

• 28 Nëntor 1443 – Kthimi i Zotit Skënderbe në tokat arbërore për të nisur luftën e lavdishme për liri, dinjitet dhe bashkim kombëtar.
• 28 Nëntor 1912 – Shpallja e Pavarësisë së Shqipërisë në Vlorë – Dita e Flamurit, kur Shqipëria u shpall e lirë dhe e pavarur përpara botës.
• 28 Nëntor 1955 – Lindja e komandantit legjendar Adem Jashari, simbolit të sakrificës dhe qëndresës në epokën moderne.
• 28 Nëntor 1997 – Dalja publike e Ushtrisë Çlirimtare të Kosovës, kur pushka shqiptare foli në emër të lirisë, në mbrojtje të popullit dhe dinjitetit njerëzor.

Një mbrëmje nderimi me një mysafir të papërsëritshëm

Ky aktivitet u shënua edhe nga një ngjarje e rrallë e cila e pasuroi dhe e bëri edhe më të thellë shpirtërisht këtë festim kombëtar: kishim nderin dhe kënaqësinë e veçantë të kishim të pranishëm aktorin e madh, të papërsëritshëm, legjendën e skenës shqiptare – z. Çun Lajçi.

Me fjalën e tij të fuqishme, me interpretimin brilant të poezive dhe rrëfimeve historike, z. Lajçi e preku zemrën e çdo të pranishmi, duke shndërruar sallën në një tempull nderimi për heronjtë dhe figurat më të ndritura të kombit tonë. Ai ishte zëri i shpirtit shqiptar, që foli me mall, revoltë, dashuri dhe përkushtim të thellë për atdheun.

Një thirrje për bashkim, kujtesë dhe krenari

Shoqata “Gjergj Kastrioti – Zvicër”, si gjithnjë, bashkoi shqiptarët nën një flamur, një këngë dhe një kujtim të përbashkët. Të pranishmit u përshëndetën me urimin:

Gëzuar Festat e Nëntorit!

Rroftë Gjergj Kastrioti i Madh!

Rroftë Shqipëria!

Rroftë Kosova!

Ky aktivitet do të mbetet gjatë në kujtesën e pjesëmarrësve si një moment i përbashkët krenarie dhe afirmimi kombëtar, ku historia nuk u përkujtua thjesht si e kaluar, por si frymëzim për të ardhmen.

ë 30 Gusht 2024, në Horën e Arbëreshëve në Sicili, u zhvillua një ngjarje historike, emocionale dhe thellësisht domethënëse për gjithë shqiptarët dhe arbëreshët që e mbajnë të gjallë kujtesën dhe amanetin e Gjergj Kastriotit – Skënderbeut, kryeheroit të pamposhtur të kombit tonë.

Në një atmosferë solemniteti dhe përkushtimi të thellë shpirtëror, u bë zbulimi i shtatores madhështore të Skënderbeut, punuar mjeshtërisht nga skulptori i njohur Gëzim Muriqi. Kjo vepër monumentale nuk është thjesht një skulpturë artistike, por një shenjë e përjetësuar e nderimit, krenarisë dhe identitetit kombëtar, e vendosur në një nga qendrat më të rëndësishme të trashëgimisë arbëreshe.

Ideatori dhe financuesi kryesor i kësaj vepre të veçantë është z. Veli Genc Berisha, një personalitet i shquar për përkushtimin ndaj çështjes kombëtare, i cili me përkrahjen e shumë shoqatave patriotike, përfshirë edhe Shoqatën “Gjergj Kastrioti – Zvicër”, bëri të mundur realizimin e këtij ëndrre të vjetër të brezave arbëreshë.

Një nderim për historinë, një përqafim mes vëllezërve. Një ditë më parë, përfaqësuesit e Shoqatës sonë patën nderin të priten zyrtarisht nga Kryetari i Komunës së Horës, z. Rosario Petta, i cili dëshmoi respektin dhe dashurinë e thellë që arbëreshët ruajnë për trungun e tyre shqiptar.

Në drekën zyrtare, përveç përfaqësuesve të shoqatave nga mërgata dhe trojet shqiptare, morën pjesë edhe figura të njohura kombëtare, ndër ta z. Lulzim Jashari, biri i komandantit legjendar Adem Jashari, që me praninë e tij i dha ngjarjes një dimension të veçantë historik dhe emocional.

Arbëreshët dhe shqiptarët: Një shpirt, një gjak, një Skënderbe.

Ky manifestim nuk ishte thjesht zbulimi i një shtatoreje, por një akt i fuqishëm simbolik dhe shpirtëror, që rikonfirmoi lidhjen e përjetshme mes shqiptarëve dhe arbëreshëve, të ndarë në hapësirë, por të bashkuar në gjak, histori dhe ideal.

Në Horën e Arbëreshëve, aty ku shqipja e vjetër flitet ende me mall dhe nder, figura e Gjergj Kastriotit u kthye në një shenjtëri të dukshme – një kujtesë se shqiptarët, kudo që ndodhen, nuk harrojnë kurrë rrënjët, luftën dhe lavdinë e tyre.

Ky përurim do të mbetet një gur themeli në marrëdhëniet shqiptaro-arbëreshe, një kujtesë e përhershme se Skënderbeu nuk është thjesht një figurë e së kaluarës, por një frymëzim i gjallë për të tashmen dhe të ardhmen tonë kombëtare. Shoqata “Gjergj Kastrioti – Zvicër” është krenare që ishte pjesë e kësaj ngjarjeje të paharrueshme, duke dëshmuar edhe njëherë përkushtimin e saj për ruajtjen e identitetit kombëtar, nderimin e historisë dhe afrimin e shqiptarëve në çdo cep të botës.

Më 30 Qershor 2024, Shoqata “Gjergj Kastrioti” në bashkëpunim me Shoqatën motër “Bashkimi” në Uster, mori pjesë me krenari dhe përfaqësim dinjitoz në Eidgenössisches Trachtenfest 2024 – një nga ngjarjet më të rëndësishme tradicionale të Zvicrës, e mbajtur në qytetin historik të Zürichut.

Kjo festë federale e kostumeve popullore mblodhi bashkë komunitete nga të gjitha kantonet dhe kulturat e pranishme në Zvicër, për të kremtuar larminë dhe trashëgiminë e tyre kulturore. Në këtë atmosferë shumëngjyrëshe dhe festive, flamuri shqiptar dhe veshjet tona kombëtare qëndruan krenare dhe të dallueshme, duke dëshmuar se kultura shqiptare është e gjallë, autentike dhe e mirëpritur në mozaikun zviceran të bashkëjetesës.

Ne si shoqatë prezentuam me krenari ‘uniformën’ dhe përkrenaren me vlera të veçanta botërore të Gjergj Kastriotit – Skënderbeut, heroit tonë të pamposhtur dhe mbrojtësit të qytetërimit perëndimor. Kjo përkrenare legjendare, jo vetëm që përfaqëson trimërinë dhe urtësinë e Skënderbeut, por edhe dëshmon për rrënjët tona të thella europiane dhe rolin historik të shqiptarëve në mbrojtjen e lirisë dhe dinjitetit njerëzor.

Me veshjet tona tradicionale, këngët, vallet dhe simbolet tona kombëtare, Shoqata “Gjergj Kastrioti” dha një kontribut të vyer në këtë festë ndërkombëtare, duke e bërë kulturën shqiptare të njohur dhe të vlerësuar nga të pranishmit.

Ky aktivitet është një tjetër dëshmi e misionit tonë për të ruajtur dhe promovuar trashëgiminë tonë kulturore, për të ndërtuar ura miqësie mes popujve dhe për të afirmuar me krenari identitetin tonë kombëtar në diasporë.

Më 23 Qershor 2024, Shoqata “Gjergj Kastrioti” mori pjesë me krenari dhe përkushtim të thellë në akademinë përkujtimore kushtuar 25-vjetorit të rënies heroike të Agim Ramadanit, një nga figurat më të ndritura të Luftës për Çlirimin e Kosovës.

Në këtë ngjarje madhështore, e cila mblodhi bashkë shqiptarë nga të gjitha trojet dhe diaspora, shoqata jonë bëri homazhe dhe nderoi veprën e përjetshme të komandantit Agim Ramadani – simbol i guximit, sakrificës dhe përkushtimit për liri. Fjala e tij dhe pushka e tij shkruan kapitujt më të lavdishëm të historisë sonë moderne. Pjesëmarrja jonë në këtë akademi ishte më shumë se një akt formal – ishte një betim i heshtur se ne nuk harrojmë kurrë ata që ranë për ne. Ishte një kujtesë se liria nuk është dhuratë, por trashëgimi e përgjakur, që duhet ruajtur me nder dhe brez pas brezi. Nëpërmjet aktiviteteve të tilla, Shoqata “Gjergj Kastrioti” forcon lidhjet mes shqiptarëve të Zvicrës dhe rrënjëve tona të përbashkëta. Me frymë të bashkuar, nën hijen e figurave si Skënderbeu dhe Agim Ramadani, ne rikonfirmojmë përkushtimin tonë për atdheun dhe për ruajtjen e vlerave kombëtare në çdo cep të botës ku jetojnë shqiptarë.

Në një atmosferë emocionuese dhe të mbushur me entuziazëm kombëtar, më 16 Qershor 2024, përfaqësues të Shoqatës “Gjergj Kastrioti – Zvicër” morën pjesë në Kampionatin Europian të Futbollit – EURO 2024, për të mbështetur me krenari dhe përkushtim Kombëtaren Shqiptare.

Ky angazhim i shoqatës në fushën sportive është dëshmi e qartë se fryma atdhetare nuk njeh kufij dhe se krenaria kombëtare pasqyrohet edhe në stadiume, aty ku flamuri kuqezi valëvitet mes mijëra zemrash shqiptare. Pjesëmarrja në këtë aktivitet sportiv të rëndësishëm në nivel europian ishte një tjetër formë e manifestimit të identitetit kombëtar dhe unitetit të diasporës shqiptare në mbështetje të djemve tanë në fushën e betejës sportive.

Shoqata shpreh mirënjohje për të gjithë anëtarët dhe bashkëatdhetarët që u bënë pjesë e kësaj atmosfere madhështore, duke e përfaqësuar me dinjitet komunitetin shqiptar në Zvicër.

Forca Shqipëri! Rroftë Kombi Shqiptar!