Duke shfletuar kalendarin historik, sot më 2 mars, përkujtojmë 575 vjetorin e Kuvendit të Lezhës, ngjarje që hodhi themelet e bashkimit kombëtar, mbajtur më 2 mars 1444 në Kishën Katedrale të Shën Kollit në Lezhë, e njohur si Besëlidhja e Lezhës. Pikërisht më 2 mars 1444, në këtë vend që sot mban memorialin e Gjergj Kastriotit Skënderbeut, u zhvillua një nga ngjarjet më të rëndësishme të historisë shqiptare të mesjetës.

Më 2 mars 1444, Gjergj Kastrioti Skënderbeu, pas kthimit nga Turqia, mblodhi për herë të parë të gjitha principatat shqiptare në një kuvend të përbashkët për t’u përballur me sulmet osmane. Ky bashkim i princave shqiptarë nga veriu në jug, ku morën pjesë Arianitasit, Dukagjinasit, Balshajt, Topiat dhe princi i Malit të Zi, përfaqësoi një ide të madhe dhe novatore të Skënderbeut për atë kohë.

Kuvendi i Lezhës zgjodhi Gjergj Kastriotin si komandant të përgjithshëm të Lidhjes, duke njohur autoritetin e tij politik dhe ushtarak. Nga ky bashkim, Skënderbeu udhëhoqi rezistencën shqiptare për 25 vite kundër pushtimit osman, duke krijuar shtetin më të fuqishëm mesjetar të Arbërit, ku u farkëtua identiteti kombëtar shqiptar.

Nuk është rastësi që Kuvendi u mbajt në Lezhë, qytet që ishte në zotërimin e Venedikut dhe që përfaqësonte neutralitetin mes principatave, duke shmangur grindjet dhe krijuar ndjenjën e barazisë. Ky veprim diplomatik i Skënderbeut synonte gjithashtu të lidhte Shqipërinë më ngushtë me Evropën Perëndimore.

Besëlidhja e Lezhës mbetet një nga ngjarjet më të rëndësishme të historisë shqiptare. Data 2 mars nuk është thjesht një përkujtim, por një mesazh për bashkim kombëtar, një ftesë për të mos harruar mësimet e historisë dhe për të punuar së bashku për të ardhmen e përbashkët.

Në këtë manifestim të rëndësishëm historik, mori pjesë edhe Shoqata Gjergj Kastrioti Zvicër, duke kontribuar në ruajtjen dhe promovimin e vlerave të trashëgimisë kombëtare shqiptare.