Më 7 nëntor 2023, Shoqata “Gjergj Kastrioti – Zvicër”, në bashkëpunim me iniciatorin dhe financuesin e projektit për shtatoren e Gjergj Kastriotit – Skënderbeut, që do të vendoset me datën 4 maj 2024 në qytetin e Gjakovës, realizoi një vizitë domethënëse në atelienë e skulptorit të njohur Tal Istrefi, në Mitrovicë.

Kjo vizitë përfaqësonte një akt nderimi për artin figurativ që ka misionin të përjetësojë lavdinë kombëtare dhe trashëgiminë historike të heroit tonë të pavdekshëm. Anëtarët e Shoqatës patën mundësinë të shohin nga afër fazat e avancuara të punës në shtatoren monumentale, duke vlerësuar profesionalizmin e jashtëzakonshëm, ndjeshmërinë artistike dhe përkushtimin atdhetar të skulptorit Tal Istrefi.

Kjo vizitë ishte një njoftim i bukur shpirtëror dhe simbolik për nisjen e një projekti të madh që do të ngrihet në zemrën e qytetit të Gjakovës – një shtatore që do të jetë jo vetëm vepër arti, por një pikë reference identitare për gjeneratat e ardhshme.

Shoqata “Gjergj Kastrioti – Zvicër” falënderon të gjithë ata që po kontribuojnë me zemër, shpirt dhe mjete në këtë nismë kombëtare dhe nxit të gjithë shqiptarët që të mbështesin fuqishëm përpjekjet për ruajtjen dhe afirmimin e figurës madhështore të Skënderbeut në hapësirën shqiptare.